Pages

Wednesday, April 14, 2010

其實希臘都想自爆

孫柏文 - 獅子山學會研究部總監,AM730(投資M31-大明燈,2010.4.14)

孫柏文讀大學時,因為係通識教育,故要讀啲古希臘、羅馬嘅文化班。其中一班,就係講希臘、羅馬人嘅娛樂習慣,我上完先知原來古希臘人好鍾意睇話劇。其中一種最主流嘅故事鋪排手法,就係角色圍繞住歷史事件發展。

咁因為觀眾已經知事態發展,所以全場就得啲角色唔知自己會點。亦因為悲劇用呢種鋪排特別吸引觀眾,所以呢種劇就叫Greek Tragedy,即希臘式悲劇。呢種戲喺近代最佳嘅代表,就肯定係97年嘅《鐵達尼》。點解?因為入場觀眾個個都知隻船會沉囉!係得阿Rose同阿 Jack唔知!
大家可能會問,點解我今日無端端要分享我大學課文?原因係因為,希臘本身就係今時今日最大嘅希臘式悲劇。錢,佢哋就借咗太 多,亦還唔到。好多人估會有救星,如國際貨幣基金組織(IMF)或者歐盟,不過經過咁多次嘅「狼來了」拯救消息,希臘係唔會有人救。又或者因條件太辣,希臘本身都想自我爆煲算數。

大家又會問:「咩叫條件太辣?為求唔爆煲,指天椒都要硬食啦!」你咁諗就大錯特錯。

唔想扮瀟灑,不過從希臘政府角度來講,爆煲、走數、唔還錢唔係世界末日。係會好慘,不過絕對唔係世界末日。

走數最嚴重嘅後果,就係冇人會借錢俾你。咁如果你每日嘅使費係收支平衡,其實冇影響。不過走數有個好大嘅好處,就係唔使還錢還息,如果之前係債奴,即刻一身輕。

好, 如果同你話:「好啦,我借錢俾你,不過借俾你嗰錢嘅金額,只係啱啱好夠你還息。」你一定話:「即係要我撇掉利息開支後,使費收支平衡啦!咁不如我一次過爆煲走數,起碼唔使再借。」冇錯,以上就係希臘政府嘅計算。噚日傍晚時,希臘政府拍賣6個月同12個月後要還嘅國債,年息要4.55同4.85厘,算高。不 過比上周佢哋啲6個月債嘅7厘為低。

咁7厘有咩問題?希臘政府已警告,如果要喺7厘或以上借錢,政府不如走數算了。呢個警告唔係齋噏,原因係希臘國債嘅總和,係國民生產總值130%。如果要付7厘利息,即每年要用GDP的9.1%去還息。

咁依家歐盟、IMF要希臘將財赤由佔GDP的12.7%減至8.7%,先救佢。即要希臘撇掉利息開支後,使費不但收支平衡,仲要有盈餘,借新錢只全為還息。 問題係,若希臘政府走數,冇錯係要即時將財赤減至零,因再冇人願意貸款俾佢,不過能即時節省利息開支。若財赤要減到8.7%先能借IMF或歐盟的平錢,就 不如一次過走數,去慳GDP9.1%嘅利息開支。 計完呢條數,如果你再見希臘國債息率喺7厘以上,相信你係希臘官員,都會寧願揀爆煲。

作者為前石油業證券分析員,視股市為終身學習場所,不斷交學費。

No comments: