乜招物式不敵托市雙煞

孫柏文 (am730 8.18.2010)

BEACON上個禮拜，政府又推乜招物物式去打壓樓市。我就即刻睇吓講乜，結論係同4月底時乜招物物式一樣，對樓市冇料到。大家都知《am730》嘅專欄 中，唔少同地產業有直接關係嘅鉅子，所以孫柏文原本唔打算講。不過因呢幾日喺我屋企樓下燒味舖食晏時，聽到太多人話呢啲措施有幾「毒」、「勁」、「狠」 等，我都想分享吓睇法。

首先，經過八萬五洗劫後，大家好少聽到政府直接話推措施打樓市。最多係用「維持銀行體制穩健」等理由，去搞啲乜招物物式，去安撫嗰啲食咗失憶藥嘅輿論分子。我見到政府話，要維持銀行體制穩健所以先推新招，睇埋有乜招時，就好嬲。點解？

其中兩個措施，第一就係唔俾人買一手樓時，喺完成交易前以confirmor即係找尾數前將單位賣出嘅摸貨轉名。第二，如果取消交易要沒收訂金，由樓價 5%，增加到10%。好，假設我開開心心買一手樓，落訂冇問題，靜心等待半年後交樓。點知我突然被炒，搵另一份工，不但人工要減(因新老闆未知我幾做得嘢 住)，仲要原先喺將軍澳工業邨返工，一變變成喺東涌。層樓真係唔啱住，你想摸出，唔俾。

跟住就諗上會做按揭找尾數，點知因為人工少咗，上唔到會，想摸貨俾人又唔得，又唔可以同發展商講唔成交，可唔可以殺少啲訂。呢個情況，每個喺私人公司返工嘅上班族都可能發生，亦明要儲首期要幾耐。

咁點解政府照推？因佢哋係公務員，淨係印少個標準薪級表俾佢哋睇，已經話自己前路茫茫、香港末日。點會諗你嘅情況？你估曾蔭權真係會坐喺度諗吓你會點？佢有呢個習慣，就唔使喺佢做財爺時，香港啲燒烤炭包裝上，開始出現「珍惜生命」呢四隻大字。

講真，你就算推多一百幾廿招都好，有兩項政策不變，樓市仲係會長升長有。第一托市煞星，就係勾地表一日唔公開底價，一日勾唔到地，你都係冇增加供應。你唔 好攞幾幅黃豆咁大粒嘅地出來，就話做咗嘢。成日話底價未達標，咁你咪加個回收機制囉。底價唔等於成交價呀高官們，可唔可以唔好咁低能。市民覺得你特首咁醒 目，點解又會咁低能？你試吓連續勾出十塊八塊地，隔個禮拜就拍賣，你睇吓啲人仲敢唔敢炒？

第二托市煞星，就係我哋個聯繫匯率。美國聯儲局要印銀紙，資金湧來港，銀行息差收窄，借錢買樓超平，你敢脫鈎咩？又要壓資產價格，又要行聯匯，炒家一見， 就會買港元博升值，令更多錢湧來香港。特首，你令到頭先我講嘅個案出事，輸盡儲咗多年嘅首期，但最後原來又係冇point，除咗俾你威咗幾日外，就係極擾 民。每次有人買樓因你啲措施出事，就會又多一個仇恨你嘅人，何必呢？

作者為前石油業證券分析員，視股市為終身學習場所，不斷交學費。

http://www.am730.com.hk/old_issue/issue/2010/201008/20100818/default1.html?startpage=29