利世民, 蘋果日報 ( 財經要聞, B15 2010. 05. 17)
周末和前輩菲臘，嘆煎釀火腿西多士敍舊，講到近來接二連三倒閉的瑜伽學校。
菲臘：「瑜伽學校同美容院一樣，都係現金流同數期嘅生意。Walk-in客啊，試做啊，都係蝕本客，佢哋最終希望客人預繳一筆套票費，然後就利用中間數期將筆錢滾大。所以佢哋會不斷要啲客人預繳，做大條數。美容班姐姐對住個客重複又重複咁，點都會賣到啲套票；但瑜伽sales就難做啲。早排又有間瑜伽學校執 笠，消費者即刻提高風險意識，買少咗套票，寧願返屋企玩Wii。瑜伽學校現金流入一斷，即死。銀行落雨收遮，其實差唔多係連串事件最後一步。」
現金流入一斷即死
世民：「聽落都幾似前年次按爆破。部份現金流問題最終變成系統性solvency問題。記得雷曼之後，有啲美容院出咗事，業界就提出，執咗笠既美容院套票，繼續可以有限度通用，變相整體承擔套票風險，其實有冇道德風險問題？」
菲臘：「總好過政府立例吖。由政府去搞，一定會限住筆錢點放；簡單講，就係成個business model轉晒。如果唔係有財技補貼師奶做面，又點可以二、三百零蚊做兩粒鐘？你自己計吓，舖租加人工，點圍皮先？好似旅行社嘅集體承擔風險，so far so good啦。不過，行業小圈子制度化，又會有其他問題，例如，入行競爭門檻高咗啊，業界要求有功能組別議席啊……講返轉頭，香港班女人，閒閒哋放一、兩萬 買套票，你可以自己諗吓預付式消費嘅市場有幾大。仲有，為咗盡快令佢哋用晒啲套票，美容院要搞啲好貴、好超級嘅服務。『幹細胞激活美白』， 你聽過未？」
世民︰「瑜伽又點搞premium service喎？難怪瑜伽學校行呢條路唔通啦。當消費者累積咗好多預繳，又冇辦法用新招式消除；市場又飽和，冇新消費者進貢現金流，呢個perfect storm真係好好嘅教訓。」
利世民
http://hkliberty.wordpress.com
No comments:
Post a Comment