利世民, 蘋果日報 ( 財經要聞, B13 2010. 05. 13)
「賣地賣得好，又話高地價政策，搞到民不聊生，要政府出手。賣地成績差，又話地產商夾埋玩政府，又要做啲嘢。究竟點做班人先高興？」自稱在地產界「搵餐晏仔」的K，私底下常常批評地產發展商，但今次也站在財閥的一方。
世民：「之前，地產建設商會同政府，張弓搭箭，大家自然諗今次係官商對決，又點會有人記得，早幾晚快閃美股股災、希臘半生不死，同埋大陸收縮信貸？市民普遍以為樓市會繼續向好，呢個現象最令人擔心。」
買樓前最緊要保住收入
K：「o依家啲人真係唔識驚？世民，我都係勸你，唔好成日叫人小心風險。你記唔記得，你老友肥仔，當年話隻大笨象唔掂，俾班股民鬧咗幾耐？你又知道樓市見頂？好多人成副身家放喺層樓，你唱淡，即係話人哋會輸，咁邊有人鍾意你o架？」
世民：「我邊有唱淡？我只不過叫人記住，買樓係槓桿投資，個市升當然開心。不過，做按揭保險，九成半上會嘅人，個市郁少少已經可以負資產。所以買樓前，最緊要保住收入。其實，都係幫大家溫故知新，唔算唱淡！」
K：「你係大淡友又唔認唱淡，想點？」世民：「唱淡你又話啲人唔高興。唱好，你又話我唔顧風險。大佬，點先高興啊？」K：「如果我知道啲人點先至高興，今日就唔使喺度同你吹水，而係去咗做邱誠武個位，幫鄭汝樺度橋啦！」
利世民
http://hkliberty.wordpress.com
No comments:
Post a Comment