利世民, 蘋果日報 ( 財經要聞, B15 2010. 05. 07)
王弼：「我屋企，以前係西德馬克擁躉，一有錢，就買馬克。」王弼和世民一樣，都是對西德馬克有集體回憶的舊一代人。「之後，轉做歐元，不過07年兌1.3美元左右賣晒，同孫柏文講起，仲俾佢笑。o依家見歐元跌得咁厲害，個心都舒服啲。」
世民：「我記得嗰陣時德國仔Hans，講起歐元就火都嚟，仲話睇死歐元捱唔過5年。結果，真係俾佢批中。不過，07年最叻仔嘅都只不過睇到美國樓市泡沫，又有邊個會諗到歐元都會有事？睇嚟今次，歐元可能連一次金融危機都捱唔過。始終，美元仲係世界儲備貨幣。」世民周遭有一群眼光獨到的朋友，只可惜他們都太早提出看法。
或須踢希臘出局求存
王弼：「睇嚟希臘都要default。希臘政府慣咗大使，要緊縮開支邊有咁容易？睇吓班暴民，畀你做希臘總理，有無膽叫班暴民共度時艱？我估佢寧願賴皮，同債主講對唔住算數。」
世民：「不過，歐元想繼續存在，應該要希臘脫離歐元區。其實，希臘可以重新發行自己嘅貨幣，然後掛一個聯繫滙率。當然，到最後希臘守唔到個聯繫滙率，又或者 希臘走浮動滙率，要貶值減債，都係希臘自己嘅問題。o依家火燒連環船，大家都痛苦。其實，當年加入歐元區，息率減得最厲害嘅，就係葡萄牙、愛爾蘭、意大 利、希臘同西班牙。結果，o依家咪就係佢哋出事囉。」王弼：「踢晒呢的國家出局，不如用馬克好過啦！」
利世民
http://hkliberty.wordpress.com
No comments:
Post a Comment