Friday, September 11, 2009

我從迷債學到的教訓

孫柏文 - 獅子山學會研究部總監, AM 730 (投資M29-大明燈,2009.11.9)

金融海嘯,發人深省,孫柏文唔知大家點,不過,我就好多同財經、股市冇關係地方,都見到可以引用從金融海嘯中吸取教訓。就噚日,我去沙田馬會會所,參加早前已經報名游泳比賽。呢個比賽,係馬會為會員搞,而我見到除每項比賽有冠、亞、季軍之外,仲會好似格蘭披治賽車一樣,分站計分,到年尾有個全年總冠軍,所以就報名參加每站最多三場賽事。

點知去到游泳池時,就發覺原來我報名的男性15歲或以上三場比賽,只得我一人參賽。大家睇到呢度,可能會戥我高興,咁仲唔三場贏晒,滿牌而歸、分數盡拿?’不過,大家如果咁諗就錯!因為我每次去到中環畢打街、德輔道中交界,眼見雷曼產品投資者種哭訴,從中吸取了教訓,所以當工作人員同我講,得我一個人比賽的時候,我就即刻問:「咩情況會令我被取消資格?」我又想到,更「安全」,都要提防「黑天鵝」出現。投資者千計萬計,分析投資產品中輸贏機會時,就係冇計到莊家會「執笠」。

情況有如馬會可以推出新投注產品,就是買一場賽馬裏面,墮馬的機會,即係話,如果場馬冇出現墮馬情況,你有落注就有錢收。

大家都知道,墮馬的機會率甚微,所以賠率亦「非常可恥」,不過,投資、投機乃姜太公釣魚,願者上釣,只要有人覺得有值博率,就有人買。

就係咁,好多追求「安全」投資的投資者,就買呢「冇墮馬債券」,買定離手,等開跑。一出閘,情況雖因金融海嘯變得動盪,不過,騎師冇事,亦冇墮馬。當入直路,馬群接近終點時,投注大堂已見滿心歡喜投資者,已經排住隊等收錢。

點知場馬未跑完,廣播系統突然宣布,馬會執笠,就算場馬最終冇墮馬,結果對投資者都係「風吹雞蛋殼,財散人安樂」。所以,大家一定要切記,在生活每個環節中,「黑天鵝」可能會隨時出現。
講開體育,就要講旅發局冇東亞運飛單。聽聞早6月的時候,東亞運主辦單位,已問旅發局要唔要飛。當時旅發局冇話要,咁主辦單位就順理成章咁,飛出街賣。

點知,當出會參加運動會運動員名單時,旅發局主席田北俊就大聲喊話:「點解我冇飛?點解呀?點解呀?」田主席似乜?除似要換片BB之外,就好似今年3月,冇用28元供豐控股(005),之後又後悔,仲要賴人種投資者。好彩旅發局的功能可有可無,如果俾田少搞有效果機構,都咪話唔驚!揀佢入旅發局個,我要多謝您!

最後說回三場賽事,我都拿了冠軍,兼打破兩項大會紀錄。

作者為前石油業證券分析員。視股市為終身學習的場所,不斷交學費。

No comments: