山卡罅爆金融危機

孫柏文 (AM730,06.09.2010)

BEACON 「熱烈慶祝！花旗國失業率升至9.6%！」仲唔係全球各大報章嘅頭條？大家可能會問：「點解失業率上升，都話係熱烈慶祝呢？孫柏文係咪幸災樂禍？」我，當然唔係啦。

熱烈慶祝嗰個唔係我，係花旗國股市。上個禮拜五晚，美國勞工部宣布8月新增職位數字，結果係私人機構請多咗6萬個工人，比預期好。不過，因為進入勞動人口嘅人數，比新增職位嘅增長快，政府又因為做完十年一度嘅人口普查，同埋地區政府因冇錢繼續裁員，所以失業率上升。

不過最終股市都大升，市場由怕雙底衰退等美國聯儲局救，變成咗又望公司盈利升去帶動股價。雖然美國經濟增長，第二季得嗰1.6%，但分析員們都仲係將啲股票目標價，定喺個假設盈利會升兩成嘅水平。哎，你估啲上市公司管理層係魔術師咩，盈利可以跑贏經濟增長咁多。

點都好，市升，唔好鬥氣。好似我呢啲買咗熊證嘅人，唯有慢慢等。等乜？喺呢個銀行仲嚴重資不抵債嘅世界，一定又爆金融危機。而呢期就真係又有金融危機，仲要喺一個你諗都未諗過嘅地方。喺邊？咪就係喺阿富汗。當地最大間銀行，之前批咗好多貸款俾總統啲朋友，最後因變咗做呆壞帳，呢幾日俾人傳資不抵債，所以係咁被擠提。

見花旗國傳媒大幅報道，原因唔係會有大危機，因為間銀行嘅資產得嗰幾億美元，而係因為美國國民問：「唔係連呢間銀行都要我哋救？」 其實有呢種銀行，對做幾年就落台嘅統治者都勁有用。因為要收買啲有政治勢力嘅人，唔使直接出錢，只要叫啲銀行放債俾佢哋就得。跟住到最後自己已經下台後， 就留番個計時炸彈俾下一任嗰個搞。

下一任嗰個，又可以大條道理話唔關自己事，繼續玩呢個遊戲。哈！我知！呢啲咪就係英國人最鍾意玩嘅招數。咁大家都知我哋特首係英國人訓練出來，唔通佢做財政司時，搞嗰間按揭證券公司都係有異曲同工之效？

大家做嗰啲九成按揭買樓，一旦負資產爆斷供潮，你估邊個孭？以前97年嗰轉，啲人會死頂點都繼續供，不過依家要做九成按揭嘅，係啲年輕80後，你估以佢哋嘅脾性，佢哋會頂咩？

最後，我想講講噚日喺薄扶林舉行嘅區議會補選。我落筆嘅呢刻係唔知邊個贏，不過我亦唔係想分析、預測戰果。我想講嘅係，話說上個禮拜六拉票時，有人話某個候選人「襲擊」對手嘅助選團成員。

不過今時今日，你一咁講，啲人嘅反應係「no video，no talk」，所以我今日想呼籲所有未來會參選嘅人，選舉期間，唔該你哋學外國啲選舉工程咁，24小時咁開著個攝影機，影住對手。我哋做傳媒嘅，會感激萬分。